細閱只需 5 分鐘
叮噹，叮噹。
「歡迎歡迎，Johnson、Sarah，隨便坐丫。」
兩個人周圍望咗兩眼，見到辦公室中間有張圓形梳化，梳化旁邊有兩個搖搖木馬，二話不說即刻坐咗上去。
「我諗兩位都知今日上嚟SOBIZ面試係見咩職位？」
「Er…..好似係……」「創辦人！」
「無錯！首先我要多謝兩位既興趣同熱誠，因為做SOBIZ既創辦人係無錢賺既。今日同兩位傾下計，希望了解下你地既故事。不如，同Johnson傾傾先？」
「Johnson，可唔可以先簡單介紹下你自己？」
「唔……無乜特別，都係一個普通既香港人。大學時鍾意經濟學但揀咗讀社會學，之後走咗去讀國際發展，研究社會資源分配，而家就做關於企業同可持續發展既研究，同埋自修緊數學。聽落可能有啲隨機，將來睇希望唔係。」
「咁你點解會想創辦SOBIZ？唔通又係隨機、心血來潮？」
「我覺得社會商業呢樣野幾小圈子，入面唔少值得分享既事，但圈外面唔多人知。大家覺得『企業就係賺錢架啦，其他都係公關』，但其實係咪咁簡單呢？希望透過SOBIZ接觸多啲人，令大家重新想象商業同社會既關係。」
「你話好多人覺得『企業就係賺錢架啦，其他都係公關』，咁你自己點睇呢個講法？」
「其實公關本身未必係問題，好多時問題係『假』同『差』，即係隱惡揚善又或者做埋啲無乜用既野。如果一間公司願意腳踏實地為社會解決問題，相信無人會介意佢呃下like。同埋其實愈嚟愈多公司係由公關以外既角度處理環境社會問題，不過呢啲留番第日SOBIZ再講啦。」
「喂，面試嚟架喎咁答真係好咩！不過你話有啲事情唔係為公關而做，咁可能都好少人會知，哈哈。咁你認為SOBIZ要點樣做先可以吸引多啲人去了解，甚至支持社會商業既理念？」
「我覺得最重要係『真實』。無論係大企業定小社企，公關宣傳要包裝得正面、美好，可以理解，但如果一件事包裝得太美好，現實中就容易令人失望。社會商業仲係一個比較新既嘗試，大家都係摸著石頭過河，有成功，有失敗。與其營造一個太美好既假象，不如真實咁呈現社會商業面對既挑戰，反而可能係爭取更多人認同既第一步。」
「你話要做到真實，具體嚟講即係點？」
「任何人都應該對漂亮既說話抱有健康既懷疑態度。雖然我認同社會商業，但同時都係一個懷疑論者，會不斷質問自己：其實呢樣野有無用架？歷史上有懷疑先有進步，希望SOBIZ能夠實踐一種健康既懷疑精神。
『多元』都好重要。畢竟我地每個人掌握既資訊有限，亦會有偏見，甚至有人會有心無意講錯野。我地就好似一班人係度瞎子摸象，一定要將唔同碎片拼湊埋一齊，先可能接近大象既真實面貌。」
「唔…….好似有少少複雜。咁創辦SOBIZ，你希望達到咩目標？會有咩挑戰？」
「希望大家會覺得SOBIZ既內容有趣啦，因為我相信幽默、趣味可以將SOBIZ既內容帶得更遠，接觸更多既人。不過SOBIZ題材幾認真，要將一件認真既事講得有趣，本身都幾大挑戰，但亦係好玩既地方。」
「好！拭目以待，歡迎你加入！」
#SOBIZ #socialbusiness #社會商業 #社企